Plis pase yon ventèn anseyan ak elèv patisipe nan yon konferans deba sou edikasyon nan kad vizit solidarite (UNNOH) ak anseyan viktim tranblemantè 14 dawou 2021 pase a .

Se sou tèm “Edikasyon sitwayèn” òganizasyon sendikal branch Sid la lanse yon konferans deba maten mèkredi 29 desanm 2021 an nan oditoryòm Lyse Jan Klod Mizo.

Sou tab konferans lan te gen Marie Emelyne Lafague ak Ernst Michel- Ange Lafond ki te akonpanye militan- anseyan sendikalis la, Josué Mérilien ( Jozye Merilyen).

Pou kòdonatè Inyon Nasyonal Nòmalyen Ayisyen yo, se yon vire tounen y ap fè nan depatman Sid ak Grandans pou yo konstate kisa ki fèt nan lekòl yo epi pote solidarite l bay konfrè anseyan yo. Kòm edikasyon se manman tout Batay li pwofite reflechi sou ki kalite lekòl nou dwe genyen ak ki tip sitwayen nou dwe konstwi. Pou jan mòd sistèm edikatif la monte a timoun yo pa aprann twòp nan lekòl yo depi tou piti sou listwa yo, kilti yo, richès peyi a ak idantite yo kòm moun, kòm sitwayen.

Militan/ sendikalis la pandan tout deba a pa sispann denonse mòd sistèm edikatif k ap fèt nan peyi a ki pa yon edikasyon pratik. Pou kòdonatè a tout liberasyon peyi a dwe pase pa edikasyon sitwayen an. Tank edikasyon timoun yo bafwe se tank sitwayen yo p ap santi se yon obligasyon pou yo pa vale, pa asepte tout bagay. Sitwayen yo pa dwe kwaze bra yo ap tann , se pou yo pote kole nan mouvman sosyal ayisyen an jouk yo rive degaje yon lidèchip Kolektif, yon konsyans kolektif.

Deba a fini ak pataj kèk liv tankou pa Georges Eddy Lucien an, Espaces Périphériques et Économie d’Archipel, pa Hérold Jean- François, “Citoyenneté et État de droit en Haiti”, liv pa Josué Mérilien an, “Haiti Éducation à la Citoyenneté ( Enjeux et Perspectives)” ak albòm mizik militan atis angaje, Kebert Bastien, aka KEB, “École Nord – Mâle”, òganizatè yo te bay asistans lan.

foto ak videyo Maks – Enmbèr Marslen

Forgot Password